K.C.，專業婚禮攝影師，之前從事銀行業嘅佢自「雷曼爆煲」之後毅然離開本業，白手創辦婚禮攝影事業「www.chankichun.com/ 」，至今已經六年，更獲唔少海外攝影團體推選為亞洲前列的婚禮攝影師。


K.C.自少就好鍾意影相，當時亦只係十幾歲嘅佢係「菲林」年代已經拎住相機四圍影相。後來負笈外國，回港後任職銀行。K.C. 分享當年正值金融風暴，好多銀行界朋友都覺得今日唔知聽日事，已經有同事問起，如果唔做銀行自己想做咩呢？就係呢條問題令K.C.首次萌生念頭另起爐灶。當時同事結婚、同事仔女生日派對，K.C. 都會毛遂自薦做攝影師，累積唔少經驗。之後重會出外跟隨其他攝影公司做攝師，有時仲係做義工，都係為了整理好自己的「攝影履歷」。適逢二零零九年，「雷曼爆煲」，銀行真係裁員，身邊已經有唔少朋友「先行一步」。K.C. 諗著用半年時間，睇下攝影師會唔會成為自己事業。


「Banker」到攝影師
之前做銀行，都係「月光族」，月頭出糧，月尾就用光。無咩積蓄生意又如何開始？K.C.憶述「依個年頭可以無鋪頭，但唔可以無網站」，所以網站點都唔可以無，佢唯有日夜自行研究，最後一蚊都唔使就製作好自己網站；幸好依門生意有工先有本，投資亦唔算多，因為相機、鏡頭都有，其他就用「技術搭救」啦！此外，當時重有喺雅虎落少量廣告，由於網上廣告未太流行，每月只係用兩三千，咁就開始自己事業喇。

開頭半年其實有一半時間留意金融人力市場，睇下會唔會入返行；不過箇半年係冬季開始，正值係婚禮旺季，當時令K.C. 睇到依行幾有前景，只要自己努力足以追上。K.C. 重獲外國攝影師團體揀選為出眾攝影師，對事業頗有幫助。婚禮攝影除左「影」，K.C. 重會同新人溝通，畀下意見，例如場地燈光等等。有時客人做海外婚禮，都會跟著去。初期一兩年，婚禮事前事後都係自己一腳踢，後期再將其中外判，K.C.主要保留攝影。


創業二三事
K.C. 座右銘係「做好一件事，唔好怕蝕底」，每件事盡力做好，自然有人見到，「我地只係攝影師，其實關於婚禮攝影以外嘅事，好多人問我都可以唔答」，但K.C.覺得自己須要熱誠待人，新人亦會覺得自己真係認真辦事，畢竟「飯日日都食，但人地結婚就一生人一次」，所以K.C.幾乎有問必答，盡力為新人做到最好。創業從來唔係易事，特別比起朝九晚五坐辦公室既銀行生活，攝影師工作無定時，例如當時「每次活動工作由八點半開始，一直做到凌晨兩點，正常都十六個鐘」，K.C.講得重好輕描淡寫，而高峰期K.C. 有一個月工作廿三日，每次都係差唔多咁長時間，可以用「搵命摶」來形容。但將自己興趣轉為事業其實好幸福，加上較為彈性工作時間亦可令KC選擇係旺季時博盡，淡季則休養生息。

K.C.提醒年輕人創業最重要係「居危思危」：今個月做夠生意額先有糧，完成目標之餘，重要設法生存，「飢饉令我地創新、進步」。現時K.C.仍然好積極留意公司收支、顧客、市場脈博等等，一般「打工仔」完成工作就可以等出糧，但自己創業就唔可以喇，隨時係做咗好多野都無糧出。打開門，做生意，最重要都係一個字「誠」，K.C.強調唔應該呃客戶，要待人以誠。現時公司已經有幾隊人，K.C.主管其中一隊。此外，除了攝影重會拍攝影片，加上好多舊顧客都係中小企老闆，有時亦會搵K.C.團隊幫忙製作小型廣告。


寄語年輕人
如果年輕人覺得對現時所做既工作崗位無咩興趣，其實應該諗清楚自己條路到底想點。讀書同做生意雖然無咩關係，但K.C. 舉例如果佢英文叻，就可以做到外國人生意，呢一點就可能比行家優勝。K.C. 更寄語年輕人對著老闆，係要交「解決方法」，而唔係將問題拋返畀老闆，因為有時K.C. 有時交託一些工作畀佢下屬，但好多時同事都會話唔係自己工作範圍然後拒絕老闆。 最後節目主持人Laurence亦希望同K.C.合作，將來舉辦一些慈善攝影活動項目例如攝影展等，回饋社會。

pt 1 of 4: https://youtu.be/zynXEE6UkFM?list=PLXCaM4OKoNRUK_N7uRJIN3qGFB4sSn6pj
pt 2 of 4: https://youtu.be/UscIXeUlErU?list=PLXCaM4OKoNRUK_N7uRJIN3qGFB4sSn6pj
pt 3 of 4: https://youtu.be/dUe1oh64xM0?list=PLXCaM4OKoNRUK_N7uRJIN3qGFB4sSn6pj

網站; http://hk-feel.com/
facebook page: https://www.facebook.com/hongkongfeel